早前參加左白米X Shiny Forest嘅手工皂活動, 真係一次好特別嘅體驗~!
點解咁特別? 因為真係學到好多野~!
老闆娘Chimmi好有心, 真係感覺到佢好想幫到D有皮膚問題困擾嘅人~!
從佢嘅分享學到好多野, 以後我都會留意護膚品成份, 睇下會唔會有：DMDM, PHT & paraden, 原來呢d都係一d防腐劑嘅簡寫, 就連出名「防敏感」嘅大品牌都會含有呢d成份~!
不過又咁講, 凡事都冇兩全其美, 唔加防腐劑嘅差品就一定快到期, 冇咁方便, 所以就睇下大家點選取啦,
而我, 就越來越對天然的東東有興趣喇~!
而手工皂都可以放成年嘅, 比起花水, keep得耐好多, 所以, 如果你都想試一下天然的產品,
手工皂都係第一步呀~
未講點整之前, 不如睇下舖內實況及製成品~
店舖位於沙田石門, 舖內裝潢很有舒適天然的感覺, 最吸睛的, 除了它的花水外……
最吸睛就係呢D「蛋糕」, 猜猜這些「蛋糕」是什麼?
登登登登~!~! 原來係手工皂~!~! 好靚呀~!!! 真係可以向朋友生日時送呢個「蛋糕」比佢, 又特別、又實用、又……唔肥~~
除左「蛋糕」外, 其它手工皂都好靚呀~!
Shiny Forest內可報名學整手工皂, 我今日做的係 level 1, 唔知「蛋糕」要level幾先可以做呢?!
睇完大師級作品, 到我落場喇~
今日整嘅係~~蜜糖燕麥滋潤手工皂~~
Chimmi絕對係交足貨, 教晒我地點計出唔同成份嘅用量, 仲要mark埋製「皂」日嘅天氣概況~!
仲逐樣成份講解一下佢地唔同嘅功用~!
曾經有朋友介紹我用椰子皂, 話清潔力好好, 但當日上完堂先知, 原來椰子油成份唔好多過30%, 如果唔係, 可以會令肌膚太乾呢~!
Chimmi教我地皂化過程嘅方程式就係：
油脂 (通常用植物油) + 氫氧化鈉 + 水 = 甘油 + 肥皂
白色呢D就係氫氧化鈉喇~
先將氫氧化鈉同水加埋, 再放入容器中混合。
由於兩者加埋會釋出煙霧及剌鼻味道, 仲有熱力, 所以如果混合兩者時唔係向非常通風嘅地方, 就要放入容器中混合。
又或者, 先用冰塊混合氫氧化鈉, 再加水。
之後呢一兜, 就係棕櫊油+椰子油+乳木果脂 (簡稱A), 加熱後, 棕櫊油就會溶。
不過要keep住個溫度, 棕櫊油大約70度會溶, 唔好加得太熱~
將3種植物油溝埋, 包括橄欖油、杏仁油及米糠油 (簡稱B)。
熱的A+室溫的B溝在一起後, 溫度會變成50+ (如果冇記錯
:P)
咁就可以將已降溫, 同樣是50+度的氫氧化鈉水(氫氧化鈉+水) 溝埋~ 緊記要差唔多溫度先成事架~
跟住就大件事喇, 要不停用陰力攪拌, 我呢種粗人當然唔係好識用陰力啦, 所以好快就攰, 好彩有個拍檔
Gloria, 我地輪流攪拌, 咁就冇咁攰。
終於攪到佢變色, 最後再加埋蜜糖及燕麥, 輕輕攪勻~~
終於可以上碟喇~ 呀……唔係, 係入模喇~!
製成品呢?
未有住, 因為手工皂要放入保溫箱1-2個月, 等PH值下降至8-9左右, 方能使用。
之後仲有脫模、切皂、蓋皂章、包皂我程序, 希望夾到時間參與其中, 咁就可以再同大家分享一下喇~!!
小知識
手工皂同出面買嘅肥皂有咩分別呢?
出面買到嘅肥皂大都係用工業鹼混合劣等油脂製成, 而且仲加左合成香料呀、防腐劑呀、起泡劑、硬化劑、增稠劑、界面活性劑等等……
但手工皂就非常天然呢~~~
我已經諗定要送一舊比我嘅濕疹朋友試下, 希望幫到佢啦~!
沒有留言:
張貼留言